Nombre de messages : 58 Age : 38 Localisation : Kelibia Date d'inscription : 26/04/2007
Sujet: Syriana Live Reality Show Mer 11 Juil - 17:21
هاك النهار ألغى طوني بلير رئيس الوزراء البريطاني التحقيق اللّي كان جاري حول قضية رشاوي دفعها الأنقليز لمسؤوليين سعوديين كبار لإتمام صفقات يشتري بمقتضاها السعوديون معدّات عسكرية من الشركة البريطانية.
إلغاء التحقيق جاء كمحاولة لفكّ الأزمة مابين البلدين ولتجنّب إدانة تكون محرجة جدّا للطرف السعودي وتأكّد بالحجّة والبرهان ما يتداوله الكثير من الناس من إشاعات حول صفقات وهمية وأسلحة غير صالحة للإستعمال يقع شراؤها بمليارات الدولارات من المال العام.
حاسيلو ماهوش جديد على بلاد بوكشطة، والسعودية ماهيش البلاد الوحيدة في الجهة اللّي تصير فيها الفضائح من هذا النوع. ولكن قرار طوني بلير بتوقيف التحقيق بعد الضغوط السعودية والتهديد بتحويل الصفقة للفرنسيين، ولإن كانت النية منّو هي إبعاد الشبهات على السعوديين، فهو يمثّل في الواقع إدانة غير مباشرة للطرفين: السعودي والبريطاني، فالحرص السعودي على توقيف التحقيق بأي ثمن هو دليل ثابت على أنهم خايفين من كشف المستور وأنّ الدخان كان بالفعل تحته نار، وأما من جانب البريطانيين فهذا القرار هو بمثابة المهزلة بالنسبة لدولة تعتبر نفسها شريكة في نشر الحرية والديمقراطية في الشرق الأوسط، ويبين كذلك أنه بالنسبة للسيد بلير، العلاقة مع العرب تقتصر على معاملات ومصالح تجارية لا قيمة فيها للأخلاق ولا لإحترام الشعوب والحرية والحقوق، وهذا زادة ماهوش جديد علينا من طوني الرّهدان
حبيت في الختام نقول للناس اللّي عندها بزايد فلوس في الخليج والسعودية بالتحديد، يا إخواننا ليه الخسارة؟ سلاح بمليارات الدولارات باش ترموه في المخازن والمستودعات، موش أحسن لو تجيبو تستثمروه عندنا؟ يا خويا آش تحبّو نجيبولكم؟ كان على الصحراء موجودة، كان على الجو موجود، جيبو فلوسكم وأعملو عندنا مشاريع تربّحكم وتشغّل الناس اللّي باش تموت من البطالة، يعطيكم سخطة آش عندكم فلوس ومازلتو حتى لتوّة ما تعلمتوش كيفاش تسرقو! والباهي فاش، من بعد يطلعلك الأمير فرهود بن كشرود في حصّة كابيتال على الأم6 * يحكي على مشاريعو وإستثماراتو في أمريكا وفي باريس، ويحبّ يطلّع نفسو راجل أعمال ناجح ويفهملها في البيزنس، وزيد يتبرّع منها للأعمال الخيرية ويهدي منها كسكروتات للحجّاج ويعمل منها قنوات فضائية تعطي للناس دروس ومواعظ في الدين ومكارم الأخلاق وهي بكلّها فلوس البترول اللي شراو بيها فوشيك فسّاي وحطّوها في جيوبهم وجيوب الأنقليز والأمريكان
* l'émission "Capital" sur M6
zapatas Modérateur
Nombre de messages : 58 Age : 38 Localisation : Kelibia Date d'inscription : 26/04/2007
Sujet: Re: Syriana Live Reality Show Mer 11 Juil - 17:25
الغريب في الأمر أننا ما سمعناش رأي شيوخ الإسلام اللي نهار وطولو يخطبوا علينا في القنوات الفضائية على مكارم الأخلاق وفضائل اللحية والفولارة والفتاوى اللي تحرّم علينا في الموسيقى والرقص وتعلّم فينا أدق التفاصيل اللي تهم حياتنا الشخصية.
بالله آشبيها حكاية كيما صفقة اليمامة، فيها تلاعب بالمال العام ملك المواطنين الكلّ ما تهمّش لا عمرو خالد ولا يوسف القرضاوي ولا غيرهم من رجال الدين؟ ولاّ زعمة الدين هذا ما ينطبقش على آل سعود وغيرهم من أمراء البترول؟ رشاوي في صفقة قيمتها 86 مليار دولار يا بوقلب، يعني قد ميزانية بلادنا كاملة لمدة عشرة سنوات تقريبا، ما لقيتولها حتى حديث ولا آية ولا سورة ولا حتى إجتهاد فقهي باش تقولو راهو عيب، راهو حرام، راهو ما يجيش منّو؟ توة الأنقليز اللي هوما المنتفعين من الصفقة قيّمو الدنيا وأقعدوها على طوني بلير، ومنظمة التعاون والتنمية الإقتصادية ولاّت كولني ناكلك مع الحكومة الأنقليزية على ضرورة إتباع مبادئ الشفافية وعدم التعامل مع البلدان الفاسدة بطرق فاسدة، وإنتوما باقي تخرّفو على الرقيا والتداوي بالأعشاب والجن والسحر؟؟ هذا اللي وصّى بيه ربّي؟؟
المسألة هاذي بصراحة مهزلة ما لازمش نسكتو عليها، على خاطر الناس اللي تحب توزّع علينا الدروس هوما في أمسّ الحاجة للدروس، وللأسف العديد من الشباب الفارغ فكريّا ونفسيّا قاعد يتلقّى كيف البوهالي في دروس شيوخ النايلسات ويغرق في الجوانب الشكليّة للدين وللتيارات المتشددة اللي تـزيد تقضيلو على طرف العقل اللي في راسو
أنا نشوف أنهم الخطباء وشيوخ الدين اللي مازالو يرفضو تجديد وتطوير الخطاب الديني بطريقة تجعلو جزء من الحلّ في البلدان العربية ولاّو بفعل الجمود الفكري متاعهم وإنعدام الوعي بالقضايا اللي تعاني منها شعوبهم، كيف إنعدام الحرية وتطور العالم بصفة عامة نحو موديل ليبرالي ديمقراطي منفتح على بعضو ثقافيا وإعلاميا وإقتصاديا، هالعلماء والخطباء والشيوخ صاروا اليوم جزء من المشكلة ولازمهم آشكون يشوفلهم حلّ، على خاطر تخاذل علماء الدين عن التعرض للمهازل السياسية والمالية المكشوفة للعموم في بلدانهم وللمشاكل الأساسية اللي تعاني منها مجتمهاتهم، هذا كلّو قاعد يعطي في شرعية وشعبية للتيارات التكفيرية المتطرفة الداعية للعنف، واللي طبعا تستغل في انعدام المصداقية في الخطاب الديني الرسمي أو الشبه رسمي باش تجنّـد ضحاياها من شباب ضايع وتبعثو كيف الفوشيكة للدنيا الأخرى، هو وأيّ مسكين تعيس الحظ متعدّي بحذاه وهو في طريقو للـ"روندي-فو" الموعود مع السبعين حورية اللي يستنـّاو فيه الفوق
ربي يبقي علينا الستر وبرّ
Syriana Live Reality Show
Page 1 sur 1
Permission de ce forum:
Vous ne pouvez pas répondre aux sujets dans ce forum